Artistët e mirënjohur Lekë Dedvukaj dhe Fran Lucaj kanë prezantuar projektin e tyre më të ri muzikor, një këngë kushtuar figurës së Bacë Kurtit, duke sjellë para publikut një krijim me ngarkesë të fortë emocionale, historike dhe kulturore.
Kënga vjen si një homazh për një figurë të respektuar, e cila përmes vargjeve dhe interpretimit merr jetë në formë artistike.
Teksti i këngës është shkruar nga Gjokë Gojçaj (Bashkim Kombi), i cili përmes fjalës poetike ka arritur të përçojnë vlerat, sakrificën dhe madhështinë e figurës së Bacë Kurtit. Muzika është kompozuar nga Pjetër Kola, duke ruajtur frymën tradicionale shqiptare dhe duke e ndërthurur atë me ndjeshmëri moderne.
Interpretimi i këngës realizohet nga vëllezërit Lekë Dedvukaj dhe Fran Lucaj, të cilët me zërin dhe përkushtimin e tyre i japin këngës një dimension të veçantë emocional. Aranzhimi muzikor mban firmën e Senad Dreshajt, i cili ka krijuar një strukturë të pasur tingujsh, duke respektuar rrënjët folklorike.
Një rol të rëndësishëm në këtë projekt ka edhe çifitelia, e interpretuar mjeshtërisht nga Gent Hoxha, e cila i jep këngës një ngjyrim autentik dhe e lidh fort me traditën muzikore shqiptare.
Videoklipi është realizuar nga Power Media, duke sjellë pamje të kuruara që plotësojnë dhe forcojnë mesazhin artistik të këngës.
Ky projekt muzikor përfaqëson jo vetëm një krijim artistik, por edhe një përpjekje për të ruajtur kujtesën historike dhe trashëgiminë kulturore, duke e përcjellë atë te brezat e rinj përmes artit dhe muzikës. Kënga për Bacë Kurtin pritet të mirëpritet nga publiku dhe dashamirët e muzikës tradicionale shqiptare.
https://www.facebook.com/share/p/172b4appUd/
“Një këngë që flet me zemër për Baca Kurtin”-bashkëpunimi i ri muzikor nga Lekë Dedvukaj dhe Fran Lucaj
