Gjykata Penale në Shkup e ka pranuar kërkesën e prokurorit hetues për ti dhënë 30 ditë paraburgim Bujar Dardhishtës, ish-drejtor i Drejtorisë së Librave Amë dhe zyrtar në Elektro-Distribucionin e Maqedonisë së Veriut (EEM Distribuim). Së bashku me shtatë të dyshuar tjerë, Dardhishta është dërguar në burgun e Shutkës.
Kjo vijoi pas një aksioni policor të realizuar të mërkurën mbrëma në Kumanovë dhe Shkup, ku u arrestua Dardhishta dhe disa persona tjerë – punonjës në Elektro-Distribucionin e Maqedonisë së Veriut (EEM Distribuim).
Sipas informacioneve fillestare, bëhet fjalë për, siç thuhet, goditje të një grupi të organizuar kriminal të dyshuar për vepra penale nga fusha e korrupsionit dhe kriminalitetit ekonomik. Nga Prokuroria për Ndjekjen e Krimit të Organizuar dhe Korrupsionit e konfirmojnë aksionin që u zhvillua në disa qytete në vend.
“Nën drejtimin e një prokurori publik nga Prokuroria për Krim të Organizuar dhe Korrupsion, zyrtarë policorë nga Departamenti për Shtypjen e Krimit të Organizuar dhe të Rëndë pranë MPB, po realizojnë aktivitete në disa lokacione në Shkup dhe Kumanovë, për shkak të ekzistimit të dyshimit të bazuar për kryerjen e veprave penale të natyrës financiare-ekonomike. Më shumë detaje do të bëhen të ditura pas përfundimit të aktiviteteve në terren”, njoftoi dje Prokuroria.