Me rastin e 31-vjetorit të themelimit të Universitetit të Tetovës, kryetari i BDI-së, Ali Ahmeti, mori pjesë sot në ceremoninë solemne të ndarjes së titullit Doctor Honoris Causa për ish-Presidentin e Republikës së Shqipërisë, Prof. Dr. Rexhep Meidani.
Gjatë kësaj ceremonie, u vlerësua kontributi i jashtëzakonshëm i Prof. Dr. Meidanit në zhvillimin e dijes dhe të demokracisë, si dhe roli i tij i rëndësishëm në forcimin e bashkëpunimit mbarëkombëtar dhe në mbështetjen e vazhdueshme ndaj arsimit dhe institucioneve akademike shqiptare.
Ali Ahmeti theksoi se Universiteti i Tetovës përfaqëson një nga shtyllat kryesore të emancipimit intelektual dhe kombëtar të shqiptarëve, ndërsa figura të shquara si Akademik Rexhep Meidani mbeten frymëzim për brezat e sotëm dhe të ardhshëm.
Universiteti i Tetovës po shënon 31 vite nga themelimi i tij, duke vazhduar misionin e ndërtimit të dijes, avancimit të arsimit të lartë dhe forcimit të identitetit akademik në vend.
