Sokol Paja
Politikani Lisandër Hoxha vizitoi Federatën Pan-Shqiptare të Amerikës Vatra. Ai u mikprit nga kryetari Dr. Elmi Berisha, sekretari Dr. Pashko Camaj, editori i Diellit, patriotët Bashkim Shehu, Faton Zogiani dhe Gezim Gosturani. Në fjalën e mirëseardhjes kryetari Dr. Elmi Berisha ekspozoi historinë dhe punën dinjitoze të Federatës Vatra në shërbim të çështjes kombëtare në mërgatën e Amerikës, aktivitetet atdhetare e kulturore dhe vizionin e Vatrës në shërbim interesit kombëtar dhe komunitetit shqiptar në Amerikë e trojet etnike. Politikani Lisandër Hoxha vlerësoi rolin e Vatrës në dobi të çështjeve më të të rëndësishme të interesit kombëtar dhe gjuhës e kulturës kombëtare në mërgatën e Shteteve të Bashkuara të Amerikës.
Sekretari Dr. Camaj u shpreh në takim se një Shqipëri e fortë në Ballkan do të thotë një Kosovë edhe më e fuqishme dhe komb shqiptar gjithnjë e më i fortë në Ballkanin Perëndimor. Tema të tjera diskutimi ishin situata politike në Shqipëri e Kosovë, roli i fuqishëm i mërgatës shqiptare në lobim të interesit kombëtar, zhvillimi i Shqipërisë demokratike me vokacion perëndimor, aspekte gjeopolitike të integrimit të Shqipërisë në BE dhe nevoja e rritjes së bashkëpunimit dhe unifikimit kombëtar. Në fjalën e falenderimit politikani Lisandër Hoxha u shpreh se Vatra është e shenjtë për çdo shqiptar. Puna e Fan Nolit e Faik Konicës ka udhëhequr frymën kombëtare e patriotike të shqiptarëve.
