Memet Alimi, punonjës në Ministrinë e Punëve të Brendshme, sërish i është drejtuar zëvendësministrit të Policisë, Astrit Iseni, ndërsa konsideron se heshtja e Isenit dhe mosveprimi përballë diskriminimit dhe degradimit sistematik ndaj punonjësve shqiptarë është bashkëfajësi dhe mbështetje indirekte e atyre strukturave që synojnë të dobësojnë prezencën dhe ndikimin e kuadrove shqiptare në MPB.
Reagimi i plotë i Memet Alimit:
Shkrese, shprehim indinjatën dhe shqetësimin e thellë për gjendjen alarmante që po ndodh në kuadër të Ministrisë së Punëve të Brendshme, ku në mënyrë të hapur dhe sistematike po degradohen, diskriminohen dhe margjinalizohen punonjësit shqiptarë.
Është e papranueshme që nën drejtimin dhe praninë tuaj në postin e Zëvendësministrit të MPB-së, të lejohet dhe tolerohet kjo praktikë e padrejtë, e cila jo vetëm shkel të gjitha normat ligjore dhe kushtetuese të Republikës së Maqedonisë së Veriut, por cenon dinjitetin dhe të drejtat themelore të komunitetit shqiptar.
Heshtja juaj dhe mungesa e veprimit të menjëhershëm përballë këtij diskriminimi të hapur konsiderohet si bashkëfajësi dhe si mbështetje indirekte e atyre strukturave që synojnë të dobësojnë prezencën dhe ndikimin e kuadrove shqiptare në MPB.
Kërkojmë nga ju, me urgjencë:
Të merrni masa konkrete për ndalimin e menjëhershëm të degradimit të kuadrove shqiptare.
Të inicioni hetime të brendshme për rastet e raportuara të diskriminimit dhe transferimeve të padrejta.
Të raportoni publikisht dhe zyrtarisht për veprimet që do të ndërmerren për rivendosjen e barazisë në institucion.
Mosveprimi në këtë drejtim do të interpretohet si dështim i plotë i mandatit tuaj (në rolin e kukllës) për të mbrojtur interesat e komunitetit shqiptar në MPB dhe do të nxisë reagime të forta nga shoqëria civile, organizatat dhe opinion publik.
