Me rastin e 20-vjetorit të themelimit të paraleles së vajzave të Medresesë “Isa Beu” në Tetovë, Myftinia e Tetovës në bashkëpunim me Medresenë e Tetovës, organizoi Ekspozitën tradicionale në kuadër të manifestimit për hir të 20-Vjetorit të Medresesë, aktivitet i veçantë ky që vuri në qendër artet e bukura dhe krijimtarinë artistike të nxënëseve.
Ky organizim u zhvillua në Pallatin e Kulturës, ku u bashkuan personalitete të jetës fetare, arsimore dhe kulturore, për të vlerësuar kontributin e kësaj vatre të dijes në edukimin dhe emancipimin e vajzave të reja.
Në këtë manifestim përvec stafit arsimor të Medresesë, drejtorit të përgjithshëm dhe kordinatorit të Medresesë në Tetovë, morën pjesë edhe kordinatorët tjerë të paraleleve tjera, Myftitë e teritorit të RMV-së, sekretari, profesorë të ndryshëm, si dhe personalitete tjera të shquara të jetës fetare dhe më gjerë.
Myftiu i Tetovës, Dr. Hfz. Selver ef. Xhemaili, në fjalën e tij theksoi se artet e bukura janë pjesë e identitetit tonë fetar, kulturor dhe kombëtar, duke vlerësuar lart punimet e nxënëseve si shembull të harmonisë mes traditës dhe modernitetit. “Arti është gjuhë universale që shpreh ndjenjat, ëndrrat dhe shpresat e brezave të rinj. Përmes tyre, nxënëset jo vetëm që ruajnë trashëgiminë, por edhe zhvillojnë kreativitetin dhe aftësitë e tyre, duke kontribuar në pasurimin e jetës kulturore të komunitetit tonë,” u shpreh Myftiu.
Për ekspozitën e përgatitur nga nxënëset e Medresesë, koordinatori i paraleles së vajzave – Tetovë, Dr. Beqir ef. Memeti potencoi se kjo ekspozitë nuk është thjeshtë një shfaqje e bukurisë, por një dëshmi se si nxënëset tona, përveç dijes dhe moralit, kultivojnë edhe vlerat artistike që lidhen ngushtë me identitetin tonë fetar, kulturor dhe kombëtar.
Ndërsa, drejtori i Përgjithshëm i Medresesë “Isa Beu”, Dr. Islam ef. Islami nxënëseve ju drejtua me këto fjalë: Kjo ditë është pasqyrë e talentit tuaj, e përpjekjeve dhe përkushtimit që keni treguar në çdo detaj. Ky aktivitet nuk është vetëm formë argëtimi, por është dëshmi e gjallë se feja Islame nuk e ndalon femrën të jetë aktive, krijuese dhe e angazhuar, përkundrazi ajo e nxitë dhe e inkurajon të zhvillojë aftësitë e saja, të përvetësojë diturinë dhe të japë kontribut në shoqëri me dinjitet dhe devotshmëri.
Kreu i BFI-së, Reisul Ulema H. Shaqir ef. Fetai në fjalën e tij të rastit ju drejtua nxënësve me këto fjalë: Zoti gjithçka, ka bërë të jetë në harmoni të përsosur. Edhe natyra është një vepër që flet. Artisët në krijimtarinë e Zotit e gjejnë të bukurën. Andaj, nxënëset tona me shpirtin dhe zemrën e tyre përmes punimeve të tyre shprehin bukurinë e të Madhit Zot. Me prezencën tonë, japim përkrahje dhe freskohemi me krijimtarinë e tyre që na çon drejtë të bukurës.
Ekspozita e përgatitur nga nxënëset, e mbështetur nga Myftinia e Tetovës, dëshmoi se Medreseja “Isa Beu nuk është vetëm qendër e dijes fetare, por edhe një vatër ku kultivohen vlera të qëndrueshme artistike dhe shoqërore. Kjo ngjarje u shndërrua në një festë të artit, ku artizanatet dhe punimet e dorës u bënë urë lidhëse mes brezave dhe një dëshmi e gjallë e rolit të gruas në ruajtjen dhe zhvillimin e trashëgimisë sonë.
