Të hënën, më 20 janar, presidenti i zgjedhur i Shteteve të Bashkuara të Amerikës, Donald Trump, do të betohet në Capitol Hill.
Ceremonia e betimit do të zhvillohet në ambientet e brendshme të Capitol-it, sipas kërkesës së vetë Donald Trump, pasi temperaturat pritet të zbresin deri në -6 gradë Celsius.
Siç dëshmojnë pamjet e siguruara nga LSA, përgatitjet për këtë ngjarje madhore po vijojnë në Capitol. Për çdo inaugurim, parashikohen gjithmonë masa alternative për ta zhvilluar ceremoninë në ambiente të brendshme në rast të kushteve të këqija atmosferike.
Hera e fundit që një president e ka bërë betimin brenda Capitol-it ishte në vitin 1985, kur Presidenti Ronald Reagan nisi mandatin e tij të dytë.
Ndërkohë, po shqyrtohen plane alternative për menaxhimin e më shumë se 200 mijë njerëzve që pritet të vijnë për të ndjekur inaugurimin, si dhe për dhjetëra mijëra qytetarë që pritet të jenë të pranishëm në rrugë për të parë ceremoninë apo paradën.
