Gjykata Administrative hodhi poshtë kallëzimin e “Fronti Evropian” kundër vendimit të Komisionit Shtetëror të Zgjedhjeve(KSHZ) që kishte të bëj me pranimin e një ankese të VLEN për parregullsi në një vendvotim në komunën e Zhelinës në zgjedhjet parlamentare të 8 majit, përcjell INA.
Këtë vendim të gjykatës e ka përshëndetur koalicioni VLEN.
“E përshëndesim vendimin e Gjykatës Administrative, e cila është në një vijë me vullnetin të cilin qytetarët e shprehën më 8 maj. Ky vendim dëshmon edhe njëherë se shpresa për qytetarët në vend po vjen, ndërsa manipulimet dhe krimi i këtij pushteti hibrid po bie. Ndryshimi i filluar më 8 maj, ka filluar të realizohet, por që të jetë edhe më i shpejtë dhe më efikas i ftojmë qytetarët e vendvotimit 2101 – Komuna e Zhelinës, që të mërkurën (më datë 22 maj) të dalin dhe të shprehin vullnetin e tyre, të lirë, pa iu nënshtruar trysnive të BDI-së dhe manipuluesve të saj në ikje. Ndryshimi i nisur nuk ka kthim prapa. Ja VLEN për Zhelinën dhe për çdo qytetar në vendin tonë”, thekson VLEN në komunikatën për media.
Me vendimin e Gjykatës më 22 maj do të ketë rivoti në vendvotimin 2101 në Llërcë të Zhelinës. Votat nga rivotimi mund të ndryshojnë numrat e deputetëve në njësinë e 6 zgjedhore. Në këtë njësi, Fronti Evropian fitoi 9 deputetë, ndërsa VLEN me 7 deputetë.
