“Gjuha shqipe është në përdorim zyrtar në çdo institucion, komunë apo drejtori”, tha zëvendëskryeministri i parë i Qeverisë – Artan Grubi duke iu përgjigj në një nga pyetjet e shumta të parashtruar nga qytetarët në kuadër të takimeve “Bashkë për Europë” të liderit të BDI-së – Ali Ahmeti me elektoratin dhe bazën partiake.
“Më bëhet zemra mal në çdo tubim të Tetovës! Po bëhen shumë pyetje të mira dhe të gjitha bëhen për projekte infrastrukturore dhe projekte kapitale. Për përdorimin e dygjuhësisë, unë do them ta ndiqni seancën qeveritare të përbashkët me qeverinë e Shqipërisë, çdo shkrim sot është në gjuhën shqipe, çdo letër e kemi shqip. Gjuha shqipe në çdo institucion, komuna apo drejtori është gjuhë zyrtare. Po dëgjoj se thonë, pse Artan Grubi nuk flet në Tetovë. Mos harroni se unë kam pas vetes nja pesë Artan Gruba të tjerë, sepse trimi i mirë më shokë shumë”, u shpreh zëvendëskryeministri i parë Grubi.
Mos harroni, shtoi më tej ai, se të ndarë e të përçare na do vetëm armiku.
“Kemi kryer projekte madhore, po flas këtu për shkolla, institucione, teatrin muzikor në Tetovë etj. Kemi dalë gjithmonë fitues në çdo proces, ndaj mos lejoni të përçahemi e të jemi servil, por të bëhemi faktor vendimmarrës! Në këto rrethana gjeostrategjike për vendin tonë, mos harroni se Rusisë i konvenon të kemi vatra zjarri në Ballkan”, nënvizoi Grubi.
