Presidentja e Kosovës, Vjosa Osmani, është takuar me kryeministrin e Shqipërisë, Edi Rama, me të cilin diskutuan mbi të ardhmen e dy vendeve dhe rritjen e bashkëpunimit.
Në komunikatën e Presidencës u bë e ditur se Osmani është shprehur pro rrugës për një të ardhme më të ndritshme dhe më të integruar.
“Një bisedë përmbajtësore rreth aspiratës së përbashkët evropiane të Kosovës dhe Shqipërisë. Duke punuar së bashku, Kosova dhe Shqipëria mund të hapin rrugën për një të ardhme më të ndritshme dhe më të integruar”, ka deklaruar Osmani.
Presidentja Osmani ka shtuar se në raport me procesin e dialogut me Serbinë, Kosova është palë konstruktive, duke përmendur njohjen reciproke, ruajtjen e integritetit territorial, sovranitetit, rendit kushtetues dhe funksionalitetit institucional.
“Presidentja Osmani dhe kryeministri Rama shprehën optimizmin e tyre për të ardhmen e marrëdhënieve Kosovë-Shqipëri dhe vunë theksin në potencialin për rritje të bashkëpunimit në fusha të ndryshme të interesit të dyanshëm”, thuhet në komunikatë.