Një gjykatë në Moskë ka zgjatur të enjten për tre muaj të tjerë paraburgimin e gazetarit të burgosur amerikan, Evan Gershkovich.
Ai do të vazhdojë të qëndrojë I ndaluar nën akuzat për spiunazh deri në fund të muajit nëntor, sipas njoftimit të agjencisë ruse shtetërore të lajmeve, Tass.
Gazetari i gazetës së përditshme “The Wall Street Journal” u arresta në fund të muajit mars ndërsa po raportonte nga qyteti rus Jekaterinburg.
Moska zyrtare e akuzon atë për spiunazh, akuza këto që ai, punëdhënësi i tij dhe qeveria amerikane i mohojnë plotësisht. Departamenti amerikan i Shtetit thotë se arrestimi i zotit Gershkovich është i jashtëligjshëm.
Zoti Gershkovich është gazetari i parë amerikan, që është arrestuar nga Rusia nën akuza për spiunazh që nga Lufta e Ftohtë.
31 vjeçari Gershkovich, arriti në gjykatën e Moskës të enjten në një automjet të bardhë të burgut dhe u nxorr nga makina me duar të lidhura. Ai doli para gjykatës për të dëgjuar kërkesën e prokurorisë, që i zgjati sërish paraburgimin, vendim që hyn në fuqi nga 30 gushti.
Kjo është hera e dytë që zotit Gershkovich i zgjatet paraburgimi për tre muaj.
Gazetarët nuk u lejuan të jenë të pranishëm për të përcjellë zhvillimet në gjykatë. Sipas agjencisë ruse Tass, seanca u mbajt pas dyerve të mbyllura për shkak të natyrës së klasifikuar të disa detajeve të çështjes.
Në një deklaratë të enjten, gazeta “The Wall Street Journal” tha: “Sot, kolegu ynë dhe gazetari i spikatur Evan Gershkovich doli para gjykatës për një seancë dëgjimore në paraburgim, ku mbajtja e tij e padrejtë u zgjat sërish. Jemi thellësisht të zhgënjyer që ai vazhdon të mbahet në burg në mënyrë arbitrare dhe të jashtëligjshme për shkak të punës së tij si gazetar. Akuzat e pabaza kundër tij janë kategorikisht të trilluara. Ne do të vazhdojmë të kërkojmë lirimin e tij të menjëhershëm. Gazetaria nuk është krim.”
Top Channel