Lionel Messi me Inter Miami vijon të lërë gjurmë, teksa siguroi finalen e radhës në aventurën e re në SHBA. Kampioni i botës asistoi dy herë në kohën e rregullt të lojës, duke ndihmuar skuadrën të barazonte 2-2 gjatë 90 minutave, teksa ndodhej në disavantazh të dy golave.
120 minuta lojë përfunduan 3-3 në transfertë me Cincinnatin dhe u deshën penalltitë për suksesin e radhës. Messi thuajse nuk bëri asgjë për 70 minuta lojë, por më pas asistoi dy herë në përmbysjen epike. Herën e dytë e bëri në minutën e 97-të, në “frymën e fundit”.
Më pas erdhi koha shtesë dhe penalltitë, ku Messi me qetësi olimpike shënoi nga pika e bardhë dhe më pas edhe katër të tjerët e skuadrës nga Florida. Messi ka luajtur tetë ndeshje radhazi, me një gol ose asist për të tijtë.
Ai e ka ndihmuar Inter Miami të kalojë në finalen e dytë të kupës, që nga mbërritja e tij në mes të verës. Para ardhjes së tij, Inter Miami konsiderohej skuadra më e dobët në MLS, por tani është si një film, ndaj duhet parë çdo ndeshje.
Finalja e “Open Cup” do të jetë një mundësi për Messin, që të fitojë trofeun e tij të 45-të, duke u thelluar rekordin e tij. Në finale Inter Miami do të ndeshet me Houston Dinamo, sfidë që do të luhet pas një muaji.
(BalkanWeb)
