Presidenti ukrainas Volodymyr Zelensky i bëri thirrje të premten NATO-s që të zgjidhë çështjen e ofertave të anëtarësimit të Suedisë dhe Ukrainës, duke thënë se pavendosmëria po kërcënon fuqinë e aleancës dhe sigurinë globale.
Duke luftuar një pushtim rus për më shumë se 16 muaj, Kievi ka shprehur zhgënjimin në rritje me aleatët e tij perëndimorë mbi garancitë që një ditë do t’i bashkohet aleancës.
“Ne presim unitet brenda aleancës në samitin e ardhshëm të NATO-s. Uniteti është forca e NATO-s. Kjo forcë shtrihet në besimin e shoqërisë së të gjitha vendeve aleate. Është shumë e rëndësishme që njerëzit e vendeve të NATO-s të dëgjojnë se janë të sigurt. Dhe uniteti është siguri”, tha ai.
Ai foli gjatë një vizite në Sllovaki përpara se të shkonte në Turqi për bisedime me Presidentin Rexhep Tajip Erdogan, i cili ka bllokuar ofertën e anëtarësimit të Stokholmit në NATO.
Zelensky tha se Kievi priste “rezultate pozitive ose të paktën disa hapa drejt rezultatit pozitiv” në samitin e Vilnius.
Lideri ukrainas mbërriti në Sllovaki, fqinjin perëndimor të Ukrainës, nga Praga dhe më pas mbërriti në Stamboll për bisedime me Erdoganin.
Top Channel