Kryeministri i Malit të Zi, Dritan Abazoviç tha në konferencën e përbashkët me Edi Ramën se vizita e kryeministrit shqiptar atje vërteton marrëdhëniet e mira fqinjësore.
Sipas tij ka një atmosferë të mirë mes të dyve dhe ekipeve të tyre.
“Iniciativa e kryeministrit të Shqipërisë do të marrë vetëm mbështetjen tonë. Ne nuk mbështesim asnjë lloj agresiviteti. Çdo gjë që është rezultat i dialogut, marrëveshjes, çdo gjë që nënkupton që dy apo më shumë palë të ulen, të flasin njëra me tjetrën, që me mënyra demokratike të arrijmë një zgjidhje, ne absolutisht e mbështesim. Në këtë kontekst e shohim pozitive vizitën e zotit Rama, i cili ka vizituar dhe vende të tjera të rajonit. Sonte ka një pjesë të takimeve të tij dhe kur është fjala për Malin e Zi ai gjithmonë është i mirëpritur. Jo vetëm ai, por çdo kryeministër i rajonit, çdo kryeministër nga Europa, nga çdo pjesë e botës që vjen me mesazhin që si bashkarisht, në mënyrë konstruktive t’i zgjidhim gjërat në mënyrë paqësore, dinjitoze dhe demokratike,” – u shpreh Abazoviç.
