Trazirat e dhunshme tronditën qytetet franceze pas vrasjes së një 17-vjeçari nga policia pak ditë më parë. Në shumë qytete protestuesit dogjën makinat dhe ndërtesa, njëkohësisht shkatërruan shumë vende, situatë që solli edhe përplasje me forcat e rendit.
Ministri i Brendshëm deklaroi se 40,000 oficerë u vendosen në të gjithë Francën, ndërsa opozita bëri thirrje për shpalljen e gjendjes së jashtëzakonshme edhe pse deri më tani qeveria ka refuzuar marrjen e një hapi kaq të rëndësishëm.
Rreth 180 persona janë arrestuar dhe 170 oficerë janë plagosur, si pasojë e trazirave të rënda.
Forcat e rendit u përpoqën ta mbulonin ngjarjen me pretendimet se adoleshenti i ishte drejtuar atyre me makinë duke i vënë në rrezik, por pamjet filmike treguan se dy policë kishin qenë duke folur me të përmes xhamit dhe njëri qëllon në kohën kur i riu thjesht tentoi të largohej me makinë, pa bërë asnjë veprim tjetër kërcënues ndaj tyre.
Gjatë ditës policia e ndërpreu marshimin duke përdorur gaz lotsjellës në mënyrë që të shpërndaheshin.
Deri më tani nuk ka asnjë shenjë që protestat të ndalen, ndërsa oficeri I policisë është arrestuar dhe po përballet me akuzën e vrasjes.
Top Channel