Këshilltari i lartë i Departamentit amerikan të Shtetit, Derek Chollet, i ka thënë të dielën presidentit serb, Aleksandar Vuçiq se, Shtetet e Bashkuara e mbështesin plotësisht propozimin e Bashkimit Evropian për normalizim të marrëdhënieve në mes të Prishtinës dhe Beogradit.
Kjo është bërë e ditur përmes një bisede telefonike midis tyre një ditë para takimit midis Kosovës dhe Serbisë.
Chollet i ka thënë Vuçiqit se pret që takimi i 27 shkurtit me kryeministrin e Kosovës, Albin Kurti në Bruksel, të jetë konstruktiv, dhe me përparim të dukshëm drejt marrëveshjes.
Chollet gjithashtu ka thënë se duhet të zbatohen marrëveshjet e nënshkruara më parë në procesin e dialogut, që nënkupton edhe themelimin e Asociacionit të Komunave me shumicë Serbe.
Shtohet se Vuçiq ka theksuar se pret një takim shumë të vështirë, por se Serbia është e përkushtuar për paqen dhe stabilitetin në rajon dhe se në këtë kontekst është i gatshëm të punojë në konceptin dhe zbatimin e planit të propozuar me kufizime të përcaktuara qartë.
Gjatë ditës së sotme, Kryeministri i Kosovës Albin Kurti, ka pranuar një letër të përbashkët nga presidenti i Francës, Emmanuel Macron, kancelari i Gjermanisë, Olaf Scholz dhe kryeministrja e Italisë, Giorgia Meloni.
Siç ka njoftuar zyra e kryeministrit këto letra kanë ardhur në lidhje me takimin e nesërm në Bruksel dhe propozimin Evropian.
“Kryeministri i Republikës së Kosovës, Albin Kurti, ka pranuar një letër të përbashkët nga Presidenti i Francës, Emmanuel Macron, Kancelari i Gjermanisë, Olaf Scholz dhe Kryeministrja e Italisë, Giorgia Meloni në lidhje me takimin e nesërm në Bruksel dhe propozimin Evropian. Në këtë letër ata kanë mirëpritur deklarimet publike të kryeministrit Kurti sa i përket propozimit Evropian”, thuhet në njoftimin e ZK-së.
Sipas këtij njoftimit, Schloz, Macron dhe Meloni janë shprehur të bindur se zbatimi i planit franko-gjerman është thelbësor nga i cili përfitojnë qytetarët e Kosovës.
Ndërkaq, përfaqësuesi i lartë i BE-së për Politikë të Jashtme, Josep Borrell, takimin e së hënës e konsideron si mundësi unike për marrëveshje normalizimi.